Psalm 23

מִזְמוֹר לְדָוִד  יְהוָה רֹעִי לֹא אֶחְסָֽר׃
בִּנְאוֹת דֶּשֶׁא יַרְבִּיצֵנִי  עַל־מֵי מְנֻחוֹת יְנַֽהֲלֵֽנִי׃
נַפְשִׁי יְשׁוֹבֵב  יַֽנְחֵנִי בְמַעְגְּלֵי־צֶדֶק לְמַעַן שְׁמֽוֹ׃
גַּם כִּֽי־אֵלֵךְ בְּגֵיא צַלְמָוֶת לֹֽא־אִירָא רָע  כִּֽי־אַתָּה עִמָּדִי
שִׁבְטְךָ וּמִשְׁעַנְתֶּךָ  הֵמָּה יְנַֽחֲמֻֽנִי׃
תַּֽעֲרֹךְ לְפָנַי  שֻׁלְחָן  נֶגֶד צֹֽרְרָי
דִּשַּׁנְתָּ בַשֶּׁמֶן רֹאשִׁי  כּוֹסִי רְוָיָֽה׃
אַךְ  טוֹב וָחֶסֶד יִרְדְּפוּנִי  כָּל־יְמֵי חַיָּי
וְשַׁבְתִּי בְּבֵית־יְהוָה  לְאֹרֶךְ יָמִֽים׃